د وسلوال پوځ لوی درستیز او د ملي دفاع وزارت سرپرست ستر جنرال محمد یاسین ضیاء غزني ولایت ته ولاړ
د وسلوال پوځ لوی درستیز او د ملي دفاع وزارت سرپرست ستر جنرال محمد یاسین ضیاء, نن غزني ولایت ته ولاړ.
په دې سفر کې ستر جنرال محمد یاسین ضیاء د غزني ولایت له لوړ پورو چارواکو او د کومانډو ځانګړو ځواکونو قول اردو قوماندان جنرال هیبت الله علیزي د یاد ولایت امنیتي وضعیت ارزونه وکړه او د جګړې په لومړۍ کرښه کې د سرتیرو سره لیدنه وکړه.
ستر جنرال محمد یاسین ضیاء وویل:"د طالبانو پلان د غزني ولایت سقوط وو, چې د ماتې سره مخ شو او د یاد ولایت په ورورستیو عملیاتو کې ترهګرو ته ډېر درانه تلفات واوښتل.
د وسلوال پوځ لوی درستیز د درېمې لوای قوماندان له دندې ګوښه کړ او پر ځای یې ډګرمن احسان الله "فیض" د یادې لوا د قوماندان په توګه وپیژنده او په غزني ولایت کې د ملي اردو منسوبینو ته لار ښوونه وکړه, چې ترهګرو د ځپلو په موخه خپل عملیات لا پسې زیات کړي.
همدا راز د وسلوال پوځ لوی درستیز د غزني په ښار کې د خلکو سره په لیدنه کې هغوې ته ډاډ ورکړ, چې دفاعي او امنیتي ځواکونه په بشپړ چمتو حالت کې قرار لري, هېڅکله به ترهګرو ته اجازه ورنکړي چې د غزني ولایت خلکو ته زیان ورسوي.
خلکو د دفاعي او امنیتي ځواکونو له سرښندنو قدردانی وکړه او ژمنه یې وکړه چې په هر ډول حالاتو کې به د دوې ملاتړ کوي.
