د ملي دفاع وزارت سرپرست د ایران د بهرنیو چارو له وزیر او مل پلاوي سره ولیدل
د ملي دفاع وزارت سرپرست مولوي محمد یعقوب "مجاهد" نن پخپل کاري دفتر کې د ایران د بهرنیو چارو وزیر سید عباس عراقچي او ورسره مل پلاوي کوربه و.
په دې لیدنه کې د ملي دفاع وزير د ایراني پلاوي له هرکلي سربيره، ایران او افغانستان دوه ګاونډي هېوادونه یاد کړل چې ډير ګډ مشترکات لري او د دوه اړخیزو اړیکو پر پیاوړتیا او پراختیا باندې يي ټينګار وکړ.
د ایران د بهرنیو چارو وزیر هم د دواړو هېوادونو په ګډو مشترکاتو، او په بېلابېلو برخو کې يې د دوستانه اړیکو او نږدې همکاریو پر اهمیت ټینګار وکړ.
همدارنګه، دواړو لورو د دوه اړخیزو اړیکو د پیاوړتیا، اقتصادي همکاریو، سرحدي مسایلو او نورو اړوندو موضوعاتو په اړه خبرې وکړې.
