د وسلوال پوځ لوی درستيز د سالنګ له تونل څخه لیدنه وکړه
د اسلامي امارت د وسلوال پوځ لوی درستيز قاري فصیح الدین "فطرت" د نظامي او محلي چارواکو په ملتيا نن سالنګ ته ولاړ او هلته يې د وروستۍ غمجنې پيښې له ځای څخه ليدنه وکړه.
د وسله وال پوځ لوی درستیز د پېښې له ځای څخه د لیدنې پر مهال د دغې پېښې قربانیانو ته د خپلې خواخوږۍ او ډاډ ګیرنې مراتب وړاندې کړل او د دغې لويې لارې د بيا پرانستلو په برخه کې د ژغورنې ټیمونو (طبي، انجینرۍ او اور وژنې) او د اسلامي امارت پوځ منسوبینو د هر ډول هلو ځلو قدر دانی یې وکړ.
همدارنګه د پوځ لوی درستیز د دې لويې لارې له موټر چلوونکو څخه وغوښتل، چې ترافيکي قوانين مراعات کړي او د ورته پېښو د تکرار مخه ونيسي.
