د بلخ ولایت د امنیت ټېنګښت په موخه به تازه امنیتي پلانونه پلی شي
د وسله وال پوځ لوی درستیز او د ملي دفاع وزارت سرپرست ستر جنرال محمد یاسین "ضیا"، د بلخ ولایت د امنیتي وضعیت د ارزونې په موخه نن دغه ولایت ته سفر وکړ.
په دې سفر کې د وسله وال پوځ لوی درستیز او د ملي دفاع وزارت سرپرست د لوړ پوړي پوځي پلاوي په ملتیا لومړی د بلخ له والي محمد فرهاد "عظيمي"، د ۲۰۹ شاهین قول اردو له قوماندان، ددغه ولایت له امنیه قوماندان او د ملي امنیت له رییس سره وکتل.
د وسله وال پوځ لوی درستیز او د ملی دفاع وزارت سرپرست د بلخ ولایت له لوړ پوړو امنیتي چارواکو سره، امنیتي وضعیت له نږدې وارزاوو او د یاد ولایت د امنیتي وضعیت د لا ښه والي په موخه یې امنیتي مسوولینو ته لازم هدایات صادر کړل.
د وسله وال پوځ لوی درستیز او د ملي دفاع وزارت سرپرست ستر جنرال محمد یاسین ضیا، د هېواد په شمال کې د دفاعي او امنیتي ځواکونو د اتلولیو او لاسته راوړنو په ویاړ د یادو ځواکونو قدردانی وکړه او ژمنه یې وکړه چې د ملي دفاع وزارت او ستر درستیز مشرتابه به د دوی د ستونزو د حل په موخه کوټلي او هر اړخیز ګامونه واخلي.
