د ملي دفاع وزارت لوجستیک قومندانۍ ته د برېښنا د لېږد لومړنۍ پروژې په پرانیستلو سره ددغه وزارت په مصارفو کې ۲۲۳ میلیونه افغانۍ سپما کېږي
نن د کابل شمال سبسټېشن څخه د ملي دفاع وزارت لوجستیک قومندانۍ ډیپوګانو ته د ۲۰ کیلو واټه برېښنا د لېږد پروژه ګټه اخیستنې ته وسپارل شوه.
د ملي دفاع وزارت لومړي مرستیال شاه محمود میاخېل ددغې پروژې په پرانیستلو سره وویل:"په اضافي او نا اړینو مصارفو کې سپما د ملي دفاع وزارت د مشرتابه له مهمو او سترو موخو څخه ده؛ چې د برېښنا له دې مزې څخه په ګټې اخیستنې سره به په کال کې د تېلو، روغنیاتو او جنراټورونو څخه ۲۲۳ میلیونه افغانۍ وسپمول شي او دا زموږ یو له لوړو موخو څخه ده."
دغه پروژه چې د ملي دفاع وزارت د لوجستیک قومندانۍ دایمي برېښنا تآمینوي، د سیستیکا او د امریکا پوځ د انجینیرۍ برخې په مالي مرسته جوړه شوې ده.
نږدې وخت کې به ۱۴ نورې ورته پروژې هم پرانیستل شي چې د ملي دفاع وزارت د برېښنا سترې برخې ته به ګټه ورسوي.
