۱۰۰۰ سرتېري د لومړنیو پوځي زده کړو ترلاسه کولو وروسته فارغ شول
د دغو سرتېرو د فراغت مراسم نن کابل کې د محاربوی تعلیماتو ګډه قومندانۍ کې؛ د ستردرستیز د لومړي مرستیال ډګرجنرال اقبال علي نادري او د ملي دفاع وزارت یوشمېر نورو جنرالانو او افسرانو په حضور کې ترسره شول.
دغو سرتېرو د ۱۲ اونیو په لړ کې په سختو شرایطو کې لومړنۍ پوځي روزنه ترلاسه کړه او اوس چمتو دي چې د دښمنانو پر وړاندې د افغانانو مالي او ځاني ساتنه وکړي.
د ستردرستیز لومړي مرستیال وویل:« د ملي پوځ ځواکونه د ویاړلې او باعزته سولې غوښتونکي دي، مګر د دښمن د هرډول بد نیت او کړنو پر وړاندې به ودرېږي او پرې به نږدي څو ترهګر خلکو ته ځاني او مالي زیانونه ورسوي.»
ټاکل شوې دغه سرتېري د هیواد په بېلابېلو ولایتونو کې د خلکو د امنیت خوندیتوب لپاره ځای پر ځای شي.
دغو سرتېرو چمتووالی ښودلی چې د افغانونو خوندیتوب لپاره به خپلې سینې سپر ګرځوي او د افغانستان له دښمنانو سره به د مبارزې په ډګر کې هرډول هڅه وکړي.
