په کابل کې د ډګروال نورستاني او ډګرمن کټوازي د جنازې مراسم
د ۲۰۷ ظفر قول اردو د دریمې لوا د ارکان رییس ډګروال "عبدالبصیر نورستاني" او ددغه قول اردو د دریمي لوا د دریم کنډک د ارکان رییس ډګرمن "احمد خان انګار کټوازي" د جنازې مراسم نن سهار د شهید سردار محمد داوود خان په روغتون کې د وسله وال پوځ د لوی درستیز ستر جنرال "محمد یاسین ضیا" او د ملي دفاع وزارت د جنرالانو او افسرانو په ګډون سره ترسره شول.
د وسله وال پوځ لوی درستیز ددغو شهیدانو له کورنیو سره خپله ژوره خواخوږي او غمشریکي څرګنده کړه او د خرابې هوا له امله چې د یادو شهیدانو په انتقال کې ځنډ رامنځته شو د شهیدانو له محترمو کورنیو بخښنه وغوښته.
ستر جنرال محمد یاسین ضیا د ډګروال نورستاني او ډګرمن کټوازي له کړنو ستاینه او قدرداني وکړه او ژمنه یې وکړه چې د ملي اردو کورنۍ به تل د ملي اردو د شهیدانو د کورنیو په خوا کې وي او په دې برخه کې به هېڅ ډول هڅې ونه دریغوي.
