په هرات کې ۵۰۰ سرتیري فارغ شول
ددغو سرتیرو فراغت نن د ۲۰۷ ظفر قول اردو د رهبرۍ په شتون کې ولمانځل شو. دغه سرتیري له بنسټیزو پوځي زدکړو وروسته د ۲۰۷ ظفر قول اردو له سیمه ییز ښوونیز مرکز څخه فارغ شول.
د ۲۰۷ ظفر قول اردو د ارکان رییس ډګروال عصمت الله"غروال" دغو تازه فارغ شویو سرتیرو ته د مبارکۍ په خوا کې وویل: ستاسو دا منظم صفونه، د جګړې په ډګر کې سر ښیندونکې مبارزه او له پوځي زدګړو ګټنه، د هېواد د سولې او ټیکاوو د دښمنانو په ځان لړزه رامنځته کوي.
دغو تازه فارغ شویو ځواکونو ډاډ ورکړ چې په هېواد کې به د تل پاتې سولې او ارامتیا د ټینګښت په موخه په ټول ځواک او توان سره هڅه وکړي او هېڅ چاته به اجازه ورنکړي چې هېوادوالو ته زیان ورسوي.
