د وسله وال پوځ لوی درستيز د تېرې ادارې له يو شمېر لوړ پوړو جنرالانو او افسرانو سره وکتل
د وسله وال پوځ لوى درستيز قاري فصيح الدين "فطرت" نن له غرمې وروسته د ملي دفاع وزارت په مقر کې د تېرې ادارې له يو شمېر جنرالانو او افسرانو سره وکتل.
په دې کتنه کې د وسله وال پوځ لوى درستيز هغوى د ښه نيت او هېواد پالنې د ستاينې تر څنګ وويل: د اسلامي نظام غيږه زموږ د ټولو ګرانو هېوادوالو پر مخ خلاصه ده او هر څوک کولاى شي چې په خپل ګران هېواد کې له خپلو کورنيو سره په پوره ډاډ او امن ژوند وکړي.
ورپسې د ملي دفاع وزارت پخواني مرستیال ډګر جنرال افضل "امان" او د تېر حکومت د قول اردو پخواني قوماندان تورنجنرال شعور ګل د نورو په استازیتوب خپلې ستونزې او ننګونې له لوی درستیز سره شریکې کړي او ژمنه يې وکړه چې د اړتیا په صورت کې د ملی دفاع وزارت سره هر ډول همکارۍ او خدمت ته چمتو يو.
همدا راز د تېرې ادارې جنرالانو او افسرانو د وسله وال پوځ لوی درستیز ته یو نظامي شمشير "کرچ" ډالۍ کړ او همدا راز د وسلوال پوځ له لوري هم نوموړو ته سوغاتونه د ډاليو په توګه ورکړل شول.
