د ملي دفاع وزارت مشرتابه، د مارشال فهیم ملي دفاع پوهنتون له بیلابیلو برخو لیدنه او ارزونه وکړه
د ملي دفاع وزارت لومړي مرستیال شاه محمود میاخېل، د ټکنالوژۍ او لوژستیک د تامیناتو په برخه کې د ملي دفاع وزارت مرستیال عبدالله رقیبي او د یاد وزارت د ښوونې او روزنې عمومي قوماندان ډګر جنرال پاینده محمد ناظم په ګډون، نن د مارشال فهیم ملي دفاع پوهنتون له بیلابیلو برخو څخه لیدنه وکړه.
د ملي دفاع وزارت لومړي مرستیال، دغه لوی پوځي ښوونیز او تحصیلي مرکز، د هېواد د پوځيانو د روزنې د بنسټ په توګه د لوړ ارزښت وړ وباله او وې ویل: د جګړې په ډګرونو کې اغیزمنه رهبري او سالمه پلان جوړونه له پوځي ښوونیز او تحصیلي مراکزو څخه پیلږي، له دې امله اړتیا ده چې ځوان افسران په بشپړې ژمنتیا او ریښتینولۍ سره روزنه وویني، څو د مسلکي او پوه رهبرانو په توګه د جګړې په ډګرونو کې ګډون وکړي او همداراز د پرسونل له مرګ ژوبلې او ضایعاتو څخه مخنیوی وشي.
د ملي دفاع وزارت لومړي مرستیال، د مارشال فهیم د ملي دفاع پوهنتون د مشرتابه او ښوونکو د نظرونو او وړاندیزونو د اوریدو په خوا کې، د پوځي لوړو زدکړو او اکاډمیکو درسونو د کیفیت د ښه والي په اړه اړوندو چارواکو ته لازم هدایات صادر کړل.
