د ملي دفاع سرپرست وزیر د متحده ایالاتو د دفاع وزیر سره تلیفوني خبرې وکړې
د ملي دفاع سرپرست وزیر سترجنرال بسم الله "محمدي" نن ماښام د امریکا متحده ایالاتو د دفاع وزیر لوید "استین" سره د افغانستان او امریکا د متحده ایالاتو د پوځي او ستراتیژیکو همکاریو په تړاو موثرې او هر اړخیزې ټلیفوني خبرې وکړې.
د امریکا متحده ایالاتو د دفاع وزیر د افغان دفاعي او امنیتي ځواکونو د ترهګرو ځپلو فعاله او مهم رول وستایه او وه یې ویل: موږ د افغان دفاعي او امنیتي ځواکونو د اوږد مهاله تمویل, تجهیز او د مسلکي زده کړو په برخه کې د همکاريو او افغانستان د حکومت او خلکو سره دوامداره مشارکت ته ژمن یو.
د امریکا متحده ایالاتو د دفاع وزیر د خپلو خبرو په دوام د طالبانو له لورې د تاو تریخوالي د زیاتیدو په اړه خپله اندیښنه څرګنده کړه او دا یې هر اړخیزه تفاهم ته د رسیدو له پاره خنډ وباله او په افغانستان کې د سولې مذاکراتو د رامنځته شوي فرصت نه په ګټه اخیستنې او تلپاتې سولې ټينګار وکړ.
د ملي دفاع وزارت سرپرست وزیر د د افغانستان د خلکو او حکومت سره د امریکا متحده ایالاتو د دوامداره همکاریو څخه چې هغه د ملي دفاعي او امنیتي ځواکونو د تجهیزاتو ملاتړ او په ځانګړې توګه د افغان هوایي قواوو سره د زیاتو چورلکو مرستو په برخه کې د دوي د ملاتړ نه مننه او قدرداني وکړه همداراز دواړو لورو د نړیوال تروریزم پروړاندې د مبارزې په برخه کې ټینګار وکړ.
