د اسلامي ارزښتونو او د اساسي قانون ساتنه ترټولو سپیڅلې دنده ده چې د ملي اردو ځواکونو له لوري ترسره کیږي
د اساسي قانون د پلي کیدو اوولسمه کلیزه د ملي دفاع وزارت کې ولمانځل شوه.
په دې غونډه کې د ملي دفاع وزارت لومړي مرستیال شاه محمود "میاخیل"، د لوي څارنوالۍ مرستیال غلام حیدر "علامه"، د اساسي قانون د پلي کیدو د څارنې کمیسیون مرستیال ډاکټر عبدالله "شفاهي" او د ملي دفاع وزارت رییسانو، جنرالانو او افسرانو ګډون درلود.
د ملي دفاع وزارت لومړي مرستیال د افغانستان د اساسي قانون د پلي کولو په موخه د دفاعي او امنیتي ملي ځواکونو له سرښندنو او قربانیو څخه د ستاینې او قدرداني تر څنګ وویل: " د اساسي قانون پلي کیدو ته پاملرنه او د قانون په رڼا کې د چارو تر سره کیدل د ملي دفاع وزارت رهبرۍ له لومړیتوبونو څخه دي".
د ملي دفاع وزارت د حقوقو چارو رییس وویل: " د اساسي قانون او په هېواد کې د نورو نافذه قوانینو له پلي کیدو څخه په ملي دفاع وزارت کې په کوټلې توګه څارنه کیږي".
د اساسي قانون پر تطبیق د څارنې خپلواک کمیسیون سرپرست وویل: د افغانستان اسلامي جمهوريت اساسي قانون په اسلامي هېوادونو کې ترټولو جامع، مډرنه او اسلامي قانون دی چې د دې قانون ساتونکي دهېواد اتلان دفاعي او امنیتي ځواکونه دي او ترټولو پاکه او سپېڅلې دنده ده چې امنیتي ځواکونه یې ترسره کوي.
همدا راز د لويې څارنوالۍ مرستیال په خپله وینا کې وویل: " زموږ د اساسي قانون بنسټیز ارزښتونه په مطلقه توګه د اسلام سپیڅلي دین سره بشپړه همغږي لري؛ د وګړو حقوق او وجایب په دې قانون کې د اسلامي سپارښتنو پر بنسټ پیژندل شوي دي، نو له دې کبله هغه ځواکونه چې له دې قانون څخه ساتنه کوي د دوې لاسونه یې د ښکلولو دي.
