د ملي د فاع سرپرست وزیر اسد الله خالد د خاک جبار ولسوالۍ له پوځيانو سره و لیدل
د کب میاشتې ۹ مه، چې د سرتیري د ملي ورځې په نوم نومول شوې ده په همدې مناسبت، د ملي د فاع سرپرست وزیر اسد الله خالد د خاک جبار ولسوالۍ له پوځيانو سره و لیدل
د کب ۹ مه ورځ، چې د هیواد د دفاعي او امنیتي ځواکونو ملي ورځ ده، د ملي دفاع سرپرست وزیر د کابل د ۱۱۱ مرکزي فرقې د دوهمې پلې لوا د شپږم کنډک په قرارګاه کې، چې د خاک جبار په ولسوالۍ کې ځای پر ځای شوی دی لیدنه وکړه.
د ملي دفاع سرپرست وزیر په داسې حال کې، چې د یاد وزارت د پالیسۍ او ستراتیژۍ مرستیال عبدالحی رؤف هم ورسره مل وو د پوځیانو په غونډه کې د خبرو پر مهال د ملي پوځ او ملي پولیسو د منسوبینو هغه هڅې چې په اړونده امنیتي ساحو کې یې تر سره کړې دي د ستایلو وړ وبللې او افغان پوځیان یې د هیواد د خلکو ویاړ وبلل.
همدا رنګه ښاغلي خالد زیاته کړه( د تاریخي پلوه د کب پر ۹ مه نېټه غازي امان الله خان د لومړي ځل لپاره د افغانستان د خپلواکۍ بنسټ کېښود. په همدې مناسبت دوه کاله د مخه د افغانستان د اسلامي دولت جمهور ریئس او د وسلوال پوځ د اعلی سرقومندان لخوا هم دغه ورځ د افغان امنیتي او دفاعي ځواکونو په نوم و نومول شوه).
د ملي دفاع وزارت سرپرست د هیواد دفاعي او امنیتي پوځ منسوبینو ته په خطاب کې وویل(هر هغه ګام، چې د هیواد او خلکو څخه د دفاع، د ملي نوامیسو د ساتنې او افغانستان ته د سولې د راوستلو په لار کې یې پورته کوئ په یقیین سره، چې الله(ج) به یې اجر در کوي او د هیواد هر وګړی پر تاسو ویاړي او د افغانستان زرین تاریخ به تاسو د هیواد د رېښتینو اتلانو په توګه یادوي.
