د ملي دفاع سرپرست وزیر د اروپايي اتحادیې د غړو هېوادونو له استازو سره وکتل
د ملي دفاع سرپرست وزیر ستر جنرال بسم الله "محمدي" په کابل کې د اروپايې اتحادیې استازي له مرستیال او د فرانسې، سویډن، هالنډ، ایټالیا، اسپانیا، ډنمارک، المان، چک او فنلینډ د سفیرانو او د هغوې له مرستیالانو سره وکتل, په تیرو دوه لسیزو کې د افغانستان حکومت او خلکو سره له مرستو یې قدردانی او مننه وکړه او دغه مرستې یې د هېواد په پرمختګ کې مهمې وبللې.
د ملي دفاع سرپرست وزیر وویل:" افغانستان تر اوسه د ترهګرو له جدي ګواښ سره مخ دی او د تروریزم پر وړاندې مبارزه کې د نړیوالې ټولنې ملاتړ او مرستو ته اړتیا لري او موږ خوښ یو چې نړیواله ټولنه په ځانګړي توګه د اروپایې اتحادیې غړو هېوادونو د افغانستان سره د ملاتړ او مرستو د دوام ژمنه وکړه."
د ملي دفاع سرپرست وزیر خوښي څرګنده, چې د دفاعي او امنیتي ځواکونو څخه هم خلک پراخه ملاتړ کوي او هم نړیواله ټولنه له ځان سره لري.
بسم الله محمدي زیاته کړه:" چې د افغانستان خلک د دفاعي او امنیتي ځواکونو تر څنګ ولاړ دي او په دې وروستیو کې ولسي پاڅونکونکو د دغو ځواکونو په ملاتړ او دفاع کې ودریدل او د هغوی ټولې کړنې د دفاعي او امنیتي ځواکونو سره په همغږۍ تر سره کیږي.
ورپسې په افغانستان کې د اروپایې اتحادیې د سفیر مرستیال او د اروپایې اتحادیې سفیرانو او ډیپلوماتانو د خلکو د ځان او مال په ساتنه کې د دفاعي او امنیتي ځواکونو د هڅو او سرښندنو قدردانی او ستاینه وکړه.
د اروپایې هېوادونو سفیرانو وویل, چې د دوی هېوادونه به د افغانستان له حکومت او خلکو سره خپلو مرستو ته دوام ورکړي، دوی به په هیڅ ډول شرایطو کې د افغانستان خلک یوازې نه پریږدي او د افغانستان د پرمختګ لپاره به لازم فرصتونه برابر کړي.
