د ملي دفاع وزارت د ځانګړو ځواکونو له فرقې څخه د ملي اسلامي اردو منسوبین له څلورمې دورې څخه فارغ شول
د ملي دفاع وزارت ٩٤٧ تنه ځانګړي کمانډو ځواکونه د سختو تمریناتو او تعليماتو وروسته د خاصو مراسمو په ترڅ کې د ځانګړو ځواکونو فرقې د تعليمي مرکز له قوماندانۍ څخه فارغ شول.
په دغه مراسمو کې د ملي دفاع وزارت سرپرست مولوي محمد یعقوب"مجاهد"، د اداره امور رئیس شيخ نورالحق"انور"، د کورنیو چارو وزارت اداري معين الحاج مولوي رحمت الله"نجیب"، د ملکي او نظامي چارو مسؤولين، علماء کرام او یو شمېر مجاهدینو ګډون درلود.
مولوي محمد یعقوب"مجاهد" په خپلو خبرو کې ځانګړي ځواکونه د اسلامي نظام د مخالفینو په وړاندې یوه نه ماتېدونکې مستحکمه کلا ياده کړه، او زیاته یې کړه چې دغه ځواکونه د پرمختللو تجهزاتو څخه په استفادې د مسلکي زده کړو وروسته د هر ډول تهديد په وړاندې چې د هیواد امنیت اخلالوي په قاطعانه ډول دفاع کوي.
په دغه مراسمو کې ځانګړي کمانډو ځواکونه په منظم یونفورم پرمختللو تجهیزاتو سمبال حضور درلود او ځانګړي کمانډویي نمایشات یې نندارې ته وړاندې کړل. نوموړو همداشان ډاډ ورکړ چې د خپلو سرونو په قرباني کولو سره به د هیواد دفاع او ساتنه کوو.
