ملي دفاع وزارت پلاوي د ايران اسلامي جمهوريت د سفارت له مرستیال سره په کابل کې ولیدل
د وسلوال پوځ لوی درستیز د ارکان رييس مولوي شبير احمد په مشرۍ، نن د اسلامي امارت د ملي دفاع وزارت پلاوي، د ايران اسلامي جمهوريت د سفارت له مرستیال سيد حسن «مرتضوي» سره په کابل کې د هرات ولايت سرحد اسلام قلعه اړوند «دوغارون» سيمې د وروستيو پېښو په تړاو خبرې وکړي.
په دې ليدنه کې، دواړو خواوو په سرحدي سيمو کې د دوه اسلامي ګاونډي هېوادونو ترمنځ ترينګلتيا او اختلاف د دښمن په ګټه وبلل او ټينګار يې وکړ، چې دغه اختلافات بايد د مذاکراتو له لارې حل شي.
دواړو اړخونو د دواړو هېوادونو د ښو اړيکو په ساتلو ټینګار وکړ او ډاډ يې ورکړ، چې په راتلونکي کې به د دغسې پېښو چې د اختلافات سبب ګرځي مخه نيسو.
له بلې خوا دواړو خواوو هوکړه وکړه، چې د سرحدي سيمو د لاښه امنيت د ټينګښت په موخه په نږدې ورځو کې ګډې ناستې ترسره کوي.
او همداراز د وړوکي اختر وروسته به په تهران يا کابل کې همداسې غونډې ترسره کړي.
