فارياب او جوزجان ولايتونو ته د ملي دفاع وزارت سرپرست وزير او د وسلوال پوځ لوى درستيز سفر
د ملي دفاع وزارت سرپرست مولوي محمد یعقوب "مجاهد" او د وسله وال پوځ لوى درستيز قاري فصیح الدین "فطرت"تيره ورځ، شمال او شمال ختيځو ولایتونو ته د سفرونو په دوام "جوزجان" او "فارياب" ولایتونو ته ولاړل او هلته يې د يادو ولايتونو مسوولينو سره جدا جدا وکتل.
په دې کتنو کې د ملي دفاع وزارت سرپرست د اسلامي امارت مجاهدینو د مبارزو د ستاينې ترڅنګ وویل:" د دې وخت رارسيدلى دى، چې ټول ورونه قومونه سره د هېواد په بيا ودانولو او پرمختګ کې کوښښ وکړو."
د ملي دفاع سرپرست زياته کړه، د اسلامي امارت ځواکونه د هېواد ځمکنۍ بشپړتيا او سرحداتو د دفاع وړتيا لري، هيڅ متجاوز ته به د امنيت خرابيدو اجازه ورنکړو او د هېواد له خاورې به د ځان په قربانۍ سره دفاع کوو.
همدا راز د وسله وال پوځ لوى درستيز قاري فصیح الدین فطرت وویل: "شل کلنې مبارزې مجاهدينو ته د يووالى او د يو بل ترڅنګ په لا يووالى سره د پاتي کيدو زده کړه وښودله."
د ملي دفاع وزارت مقاماتو په دغو سفرونو کې د علماوو، مخورو، د سيمه ييزو او لوا ګانو مسوولينو سره ليدنې وکړې او د لا ښه امنيت د ټينګښت او د هېواد له سرحداتو د دفاع په تړاو يې اړينې لارښوونې وکړې.
