د ۲۱۹ عمر ثالث فرقې څخه د ۲۰۰ تنو منسوبینو د فراغت مراسم د نظامي او ملکي چارواکو په ګډون ترسره شو
د ۲۱۹ عمر ثالث فرقې څخه د بېلابېلو قطعاتو او جزوتامونو ۲۰۰ تنو منسوبین له دریو میاشتنيو فرهنګي، نظامي، تخنیکي او تکتیکي زده کړو وروسته د دې فرقې له ښوونیز مرکز څخه فارغ شول.
ياد مراسم چې په همدې موخه جوړه شوې وه، د وسله وال پوځ لوى درستيز قاري محمد فصيح الدين “فطرت”، د ٢١٧ عمري قول اردو قوماندان مولوي امان الدين “منصور”، مولوي تاج محمد “رهبر” په مشرۍ د ملي دفاع وزارت د پلاوي ترڅنګ د بدخشان والي محمد ایوب “خالد”، د بدخشان امنیه قوماندان مولوي عزیزالله “عمر”، د فرقې مسؤولینو، د سیمه ییزې ادارې استازو، علماوو، مخورو او نورو ګډون کړی وو.
د وسله وال پوځ لوی درستيز په دغه ناسته کې وويل: د اسلامي پوځ سرتېري به له اسلام او اسلامي خاورې څخه دفاع وکړي او همدارنګه موږ باید د خلکو زړونه وګټو، ترڅو وکولائ شو په سمه توګه حکومت وکړو."
په دې مراسمو کې د بدخشان والي او یو شمېر علماوو او مخورو هم په اسلامي نظام کې د اردو د رول او اهمیت په اړه ویناوې وکړې.
د یادولو وړ ده چې دا د ملي اسلامي اردو سرتېرو د فراغت پنځمه دوره ده چې له دغه ښوونیز مرکز څخه د تجربه لرونکو استادانو په زيار د پوځي زده کړو څخه وروسته فارغېږي.
