د پنجشیر او بغلان ولایتونو څخه ۳۴۰ تنه ځوانان د ملي اسلامي اردو لیکو ته جذب شول
د ملي دفاع وزارت اړوند په جلب او جذب قوماندانۍ کې د پنجشیر او بغلان ولایتونو له بېلابیلو ولسوالیو څخه ۳۴۰ تنه ځوانان د ملي اسلامي اردو لیکو ته په فوق العاده توګ جذب شول.
د دغو ځوانانو د بایمتریک او نورو اسنادو پروسې له تکمیل وروسته چې د جلب او جذب په قوماندانۍ کې تر سره شول، د مسلکي زده کړو لپاره د حضرت عبدالله بن مسعود رض جګړه ایزو ګډو زده کړو قوماندانۍ ته معرفي شول.
دغو ځوانانو ته د وسلوال پوځ لوی درستیز الحاج قاري محمد فصیح الدین "فطرت" پخپلو خبرو کې وویل: کوم څوک چې په ټولنه کې د ظالم په وړاندې ودریږي هغه د ټولنې اتلان یادیږي، هغه څوک چې په هیواد کې د ژبې قوم او سمت په نامه اختلافات رامنځ ته کوي د هغوی لاسو لنډ کړئ؛ تاسو د یوې ازادې ملي اسلامي اردو سربازان یاست دا اردو په کامل ډول خپلواکه ده دلته هیڅ بهرنی تبعه وجود نلري.
همدا راز زیاته یې کړه: اې ځوانانو تاسې په ټولنه کې یو لوړ مقام لرئ، تاسو به د اسلامي نظام او خاورې څخه دفاع او ساتنه کوئ، تاسو چې د ملي اسلامي اردو په لیکو جذب شوی یاست د اسلامي نظام، ملي ارزښتونو او هیواد ساتنې لپاره جذب شوي یاست.
د یادونې وړ ده چې له دې وړاندې هم د یادو ولایتونو څخه په سلګونه تنه ځوانان د ملي اسلامي اردو لیکو ته جذب شوي دي.
