د ستراتیژیکو اړیکو او عامه چارو ریاست له لوري د قول اردوګانو د آمرینو او ویاندویانو سیمینار پای ته ورسید
د ملي دفاع وزارت د ستراتیژیکو اړیکو او عامه چارو ریاست له لوري د ظرفیتونو د لوړولو او ارزیابۍ دوه ورځنی سیمینار چې د قول اردوګانو او سیمیزو قطعاتو ویاندویانو او عامه چارو امرینو لپاره جوړ شوی وو، نن د یاد وزارت په مقر کې پای ته ورسید.
دغه سیمینار کې د وسلوال پوځ لوی درستیز قاري فصیح الدین "فطرت" د یاد وزارت سرمفتش مفتي لطف الله "حکیمي"، ګڼ شمیر رئیسانو او مسؤلینو ګډون درلود.
د وسلوال پوځ لوی درستیز قاري فصیح الدین "فطرت" یادو امرینو ته هر اړخیزه وینا وکړه، خپلو مسؤلیتونو ته یې متوجې کړل او زیاته یې کړه، چې په تیر شل کلن جهاد کې موږ یوازې دا نه چې په نظامي ډګر کې پیاوړي وو؛ بلکه په تبلیغاتي ډګر کې مو هم بریا ترلاسه کړې وه.
همدا راز د ستراتیژیکو اړیکو او عامه چارو رئیس مفتي عنایت الله "خوارزمی" له راغلو مسؤلینو او میلمنو څخه مننه او آمرینو ته یې د پوره همکارۍ ډاډ ورکړ، په پای کې د یاد ریاست له لوري نوموړو آمرینو ته تصدیق نامې هم ورکړل شوې.
