د دفاعي او امنیتي سکټور په برخو کې د بنسټيزو اصلاحاتو راوستل مو لومړيتوب دی
د دفاعي او امنیتي سکټور په برخه کې د بنسټيزو اصلاحاتو د راوستو په موخه نن د ملي دفاع وزارت د لومړي مرستیال شاه محمود"میاخیل" او د وسله وال پوځ لوی درستیز ستر جنرال محمد یاسین"ضیا" په مشرۍ ناسته ترسره شوه.
په دې ناسته کې د ملي دفاع وزارت جنرالانو، افسرانو او رییسانو ګډون کړی وو. دغه ناسته کې د دفاعي او امنیتي سکټور په برخه کې د بنسټيزو اصلاحاتو د راوستو په موخه جوړه شوه.
د ملي دفاع وزارت لومړي مرستیال شاه محمود"میاخیل" د دفاعي او امنیتي سکټور په برخه کې د اصلاحاتو راوستل، د دفاعي او امنیتي ځواکونو کړنې، له شته سرچینو څخه اغیزمنه ګټه اخیستنه، د جګړې په ډګر کې د افسرانو او سرتیرو ملاتړ، پوځي چارو کې په ښه توګه ښوونه او روزنه او امنیتي بنسټونو ترمنځ د ښې همغږې رامنځته کول مثبت وارزول.
د وسله وال پوځ لوی درستیز ستر جنرال محمد یاسین"ضیا" په دې ناسته کې وویل: دفاعي او امنیتي سکټور په برخه کې د بنسټيزو اصلاحاتو راوستل او پاملرنه، د ملي دفاع وزارت له لومړیتوبونو څخه دي، د اصلاحي برنامو د پلې کېدو په برخه کې له ټولو ظرفیتونو او امکاناتو څخه ښه ګټه اخیستل شوې او په دې برخه کې به نور هم په ښه توګه کار ترسره شي.
