بلخ ولایت ته د ملي دفاع او کورنیو چارو سرپرست وزیرانو سفر
ب
بلخ ولایت ته د ملي دفاع او کورنیو چارو سرپرست وزیرانو سفر
د ملي دفاع وزارت سرپرست اسدالله خالد او د کورنیو چارو وزارت سرپرست مسعود اندرابي د رامنځته شوې ستونزې د هواري په هدف بلخ ولایت ته تللي و او هلته یې د ستونزې د حل په موخه د بلخ له والي اسحاق رهګذر او استاد عطا محمد نور سره کتلي دي.
د ملي دفاع او کورنیو چاروسرپرست وزیرانو د بلخ د والي په ګډون د خبري کنفرانس په ترڅ کې د امنیتي سکتورونو د نه سیاسي کیدو پر سر ټینګار وکړ. او د چارو د ښه سمون لپاره یې په دفاعي او امنیتي برخو کې د پرسونل د تغییر او تبدیل مسله یو اصل وباله.
وروسته د بلخ والي محمد اسحاق رهګذر وویل، چې دغه ستونزه د یوې غلط فهمۍ له وجې رامنځ ته شوې وه له نېکمرغه د ملي دفاع او کورنیو چارو د سرپرست وزیرانو او عطامحمد نور ترمنځ د مفصلو خبرو نه وروسته حل او فصل شوه. د ملي دفاع او کورنیو چارو سرپرست وزیرانو هغه ګنګوسې هم درواغ وبللې، چې ګني د بلخ نوی امنیه قومندان سمونوال عبدالرقیب مبارز د بلخ ولایت یو شمیر پولیس له دندو ګوښه کوي. د دفاع او کورنیو چارو وزیرانو وویل، چې د بلخ ولایت د پولیسو ټول منسوبین به د نوي امنیه قومندان په مشرۍ خپلو دندو ته دوام ورکوي.
د کنفرانس په پای کې د ملي دفاع او کورنیو چارو سرپرست وزیرانو په بلخ ولایت کې امنیتي او دفاعي ځواکونو ته امر وکړ، چې د یاد ولایت په ځانګړې توګه د نوي کال( نوروز) د ملي په تړاو ټینګ امنیتي تدابیر ونیسي.
