ننګرهار ولایت ته د ملي دفاع وزارت د لومړي مرستیال سفر!
نن له غرمې مخکې د ملي دفاع وزارت لومړی مرستیال سترجنرال محمد یاسین ضیا په داسې حال کې، چې په افغانستان کې د ناتو عمومي قومندان جنرال سکات مېلر، د ملي امنیت د عمومي ریاست مرستیال ډګرجنرال عبادالله عباد هم ور سره و د هېواد په ختیځو ولایتونو کې د ملي دفاعي او امنیتي ځواکونو د ستاینې او په یادو ولایتونو کې د امنیتي وضعیت د څېړنې په موخه د ننګرهار ولایت هسکې مېنې ولسوالۍ ته تللي و.
د ملي دفاع وزارت لومړي مرستیال د افغان ملي دفاعي او امنیتي ځواکونو د منسوبینو څخه د لېدنې پر مهال د ننګرهار ولایت په هسکه مېنه ولسوالۍ کې د داعش ماتې پر وړاندې د دوی پوځي کړنې او لاسته راوړنې د ستایلو وړ وبللې.
د ملي دفاع وزارت لومړي مرستیال افغان پوځیانو ته په خبرو کې وویل، چې ستاسو د پوځي اتلولیو او سرښندنو په پایله کې په افغانستان کې داعشیان له ماتې سره مخ او د نابودۍ په حال کې دي.
