د کب "نهمه" د ملي دفاعي او امنيتي ځواکونو د ملي ورځې په مناسبت، د ملي دفاع سرپرست وزير پيغام
د کب" نهمه " د ملي دفاعي او امنيتي ځواکونو د ملي ورځې په مناسبت، د ملي دفاع سرپرست وزير پيغام
د ملي دفاعي او امنیتي ځواکونو درنو سرتیرو، افسرانو او جنرالانو!
السلام علیکم و رحمته الله وبرکاته!
ډېر د ویاړځای دی چې د افغانستان د جلالتمآب جمهور رئیس او د وسله والو ځواکونو د اعلی سرقوماندان د ځانگړې پاملرنې له امله د کب نهمه د ملي دفاعي او امنیتي ځواکونو څخه د قدردانۍ اوستاینې د ملي ورځې په نوم رسماً نومول شوې او د افغانستان په ګوټ ګوټ کې د دغې پرتمینې ورځې په مناسبت شانداره مراسم تر سره کیږي.
زه د ملي دفاع وزارت او ستردرستیز د مشرتابه لخوا تاسو محترمو او د قدر وړ سرتیرو، بریدملانو او افسرانو ته د زړه له کومي مبارکي وایم او د الله رب العزت له درباره تاسو اوستاسو محترمو کورنیو ته چې په ډیرو سختواو ستونزمنو شرایطو کې دهیواد د دفاع په ستر او سپیڅلي کار کې د قدر او عزت وړ خدمت کوي د لا ډیرو بریاوو او سرلوړیو هیله کوم. د ملي دفاعي او امنیتي ځواکونو منسوبین او په ځانګړې توګه د ملي اردو اتل او په هیواد مین منسوبین، چې د نصرت په نوم جګړه ييزعمليات يې په بريالیتوب او د پام وړ لاسته راوړنو سره تر سره کړل او په راتلونکي کې د خورشيد په نوم جګړه ييزو عملياتو پلي کولو ته بشپړ چمتووالی لري. اوس زموږ زړورو ځواکونو د دفاعي حالت پرځای تعارضي بڼه خپله کړې او د هغو وسله والو دښمنانو پر وړاندې چې د سولې له روان بهير سره نه يوځای کيږي، په ميړانه مقابله کوي، د هغوی پر ځالو او پټنځايونو کلک او مرګوني ګوزارونه کوي او له منځه يې وړي.
د ملي اردو ميړنيو او سرښندونکو منسوبينو!
زمونږ قدر پیژندوکي خلک تل ستاسو اتلوالو اوسرښندونکو فعالیتونو ته د قدر په سترګه ګوري، پرې ویاړي او د ملي دفاع وزارت او ستردرستیز مشرتابه تل هڅه اوهاند کوي چې د ملي اردو د پیاوړتیا اوځواکمنۍ لپاره په نه ستړي کیدونکي ډول کاراوفعالیت وکړي او په دغه ستره او سپيڅلې لاره کې د هیواد په د ننه او بهرکې د ملي اردو له ځواکونو څخه د ملاتړ کچه لاپسې پیاوړې کړي. په دې واقعیت پوره باوري یو - هرڅومره چې زمونږ ملي دفاعي او امنیتي ځواکونه پیاوړي شي د هیواد د دښمنانو شوم او مکاره پلانونه په اوبو لاهوکیږي او زمونږهیواد د سولې، ثبات او آرامۍ په لور پیاوړي او چټک ګامونه پورته کوي. له شک او تردید پرته، د ملي دفاعي او امنیتي ځواکونو څخه د جلالتماب جمهوررئیس او د وسله وال پوځ د اعلی سرقوماندان، د ملی یووالي حکومت د جلالتماب اجرائیه رئیس او د دولت د نورو بنسټونو، د ملي او نړیوالو نهادونو، غوڅ ملاتړ د دې مانا لري چې مونږ په خپلومبارزو کې بریالي یو او په خورا جدیت او لا اغیزمنتوب سره باید خپل خوځښت ته دوام ورکړو او دهیواد او خلکو د دښمنانو ناوړه او شوم پلانونه په اوبولاهوکړو.
د ملي اردو زړورو او اتلو منسوبینو!
اجازه راکړئ یو ځل بیا تا سو ته د کب نهمه، د هیواد ملي دفاعي او امنیتي ځواکونو د ملي ورځې په مناسبت مبارکې ووایو او د الله (ج) له پاک درباره تاسو ته په ورسپارل شویو دندو اومکلفیتونو کې دلا نورو بریاوو او سرلوړیو هیله کوو. د ژوند په هر ډګر کې سرلوړي او بريالي اوسئ.
په درنښت
د ملي دفاع وزارت سرپرست
اسد الله "خالد"
