د هېواد په لویدیځه حوزه کې د زلزلې له قربانیانو سره د ملي دفاع وزارت د ډاډګیرنې پیغام
د ملي دفاع وزارت په هرات او بادغیس ولایتونو کې د تېرې ورځې د زلزلې په غمجنه پېښه کې زموږ د یو شمېر هېوادوالو پر مړینه او ټپي کېدو خواشیني څرګندوي او د دغې غمجنې پېښې شهیدانو ته د پاک الله له درباره د مغفرت، ټپیانو ته د ژر تر ژره روغتیا او پاتې کورنیو ته د زړه صبر غوښتنه کوي.
د ملي دفاع وزارت مسلکي ټیمونه چې هوايي ځواک، روغتیايي پرسونل او نور منسوبین پکې شامل دي، دیادې پېښې له وخت څخه تر اوسه پورې په سیمه کې حضور لري او په پوره ایماندارۍ، زیانمن شوو هیوادوالو ته د خدمت په کولو بوخت دي.
همدا راز دملي دفاع وزارت زلزله ځپلو هیوادوالو ته د بېړنیو ستونزو هوارولو لپاره برسېره پردې چې نور مرستندویه ټیمونه هم سېمې ته لېږي، لس میلیونه افغانۍ نغدي مرسته هم ځانګړه کړې چې د ۲۰۷ الفاروق قول اردو له لورې به زلزله ځپلو هېوادوالو ته ورکړل شي.
د ملي اسلامي اردو سرتیري چمتو دي چې په هر ډول شرایطو کې د خپلو ګرانو هیوادوالو ته په پوره صداقت او اخلاص سره خدمت وکړي.
