د ملي دفاع سرپرست وزیر د افغانستان په چارو کې د چین هېواد استازی سره وکتل
د ملي دفاع سرپرست وزير مولوي محمد یعقوب "مجاهد"، نن د افغانستان لپاره د چین ولسي جمهوریت استازی یوشیايوینګ سره پخپل کاري دفتر کې وکتل.
په دې کتنه کې د ملي دفاع سرپرست وزير، ښاغلي یوشيايوینګ ته د ښه راغلاست ترڅنګ له افغانستان سره د چین د ښو اړیکو او همکاریو یادونه وکړه او ویې ویل: «د اسلامي امارت په راتګ سره له ګاونډیو هېوادونو په ځانګړې توګه له چین سره دوه اړخیزې اړیکې پراخې او ورځ په ورځ پياوړي کيږي».
دغه راز ښاغلي يوشيايوينګ په افغانستان کې د بشپړ امنيت او ثبات د ټينګښت په اړه خوشبيني څرګنده کړه، په اقتصادي او سوداګريزو برخو کې يې د افغانستان له خلکو سره د چين د ولسي جمهوريت د مرستو او همکاريو پر دوام ټينګار وکړ.
په پاى کې دواړو لوريو، د دواړو ګاونډيو هېوادونو ترمنځ د اړيکو پر دوام او لا پراختيا ټينګار وکړ.
