د مسلحو ځواکونو لوی درستیز د ملي دفاع پوهنتون محصلینو په فراغت غونډه کې ګډون وکړ
د ملي دفاع وزارت اړوند حضرت ابو عبیده بن جراح ملي دفاع پوهنتون د اسامه بن زید افسرانو اکاډمۍ د ۱۷۲ تنه محصلینو په فراغت غونډه کې د هیواد د مسلحو ځواکونو لوی درستیز حافظ محمد فصیح الدین "فطرت" ګډون وکړ.
دغو محصلینو چې یو کال عقیدوي، مسلکي او بېلابېلو فوځي برخو کې زده کړې ترسره کړې وي له شلمې دورې څخه نن د یو لړ ځانګړو مراسمو په ترڅ کې د ګڼ شمېر مسؤلینو په حضور کې فارغ شول.
د مسلحو ځواکونو لوی درستیز قاري محمد فصیح الدین "فطرت" فارغانو ته د مبارکۍ ترڅنګ لازمې لارښوونې وکړې او زیاته یې کړه چې د یو نظام لپاره اعداد او نظامي زده کړو ته اشد ضرورت دی، زموږ ملي اسلامي اردو باید په عقیدوي او پوځي زده کړو سمبال وي او خپل قوت دوښمن ته وښيي، همدارنګه زیاته یې موږ اوس مهال یوه منظمه او ژمنه اردو لرو چې د شعایرو الله، اسلامي مقدساتو او د هیواد سرحداتو د ساتلو لپاره هر ډول ایثار او قربانیو ته چمتو ده.
په پای کې فارغانو د تحلیف مراسمو ترڅنګ بېلابېل ډول فوځي نمایشات او مانورونه د مشرانو په وړاندې ترسره کړل او ژمنه یې وکړه چې د هیواد ساتنې لپاره به په هر ډول شرایطو کې د خپل سر په بیه خدمت ترسره کوو.
