د دفاعي او امنیتي ځواکونو د شهیدانو معظمو کورنیو او ددغو ځواکونو د ټپیانو لپاره په امتیازاتو کې ځانګړی زیاتوالی
د ملي دفاع وزارت لومړی مرستیال شاه محمود "میاخیل" وایي: د ملي دفاع وزارت په وړاندیز او د جمهوري ریاست د عالي مقام په منظورۍ، د هېواد د دفاعي او امنیتي ځواکونو د مبارزو، اتلولیو او سرښیندنو په ویاړ؛ د ملي دفاع او کورنیو چارو وزارتونو، د ملي امنیت عمومي ریاست او هغه ادارې چې نظامي تشکیلات لري، د منسوبینو د شهیدانو محترمې ورثې او ټپیانو ته د خواخوږۍ او رسیدنې په موخه، هغه منسوبین چې د محاربوي فعالیتونو او یا د دښمن د تروریستي کړنو له امله له بریدونو سره مخېږي، د پخوانیو قانوني امتیازاتو سربیره د شهید هرې محترمې کورنۍ ته سل زره افغانۍ او ددغو منسوبینو ټپیانو لپاره په دریو کټګوریو کې د سطحي ټپي لپاره ۱۵ زره افغانۍ، د متوسط ټپي لپاره ۳۰ زره افغانۍ او د شدید ټپي لپاره ۵۰ زره افغانۍ د اړوندو ارګانونو له بودجې څخه مرستې ترسره کېږي.
د ملي دفاع وزارت ستراتیژي، د ملي اردو د شهیدانو له معظمو کورنیو او ددغو ځواکونو له ټپیانو څخه هر اړخیز ملاتړ دی، څو له شته امکاناتو څخه د ځانګړو امتیازاتو په خوا کې مادي او معنوي مکافاتو څخه هم برخمن شي.
