د ملي دفاع سرپرست وزیر د ځوانو افسرانو اکاډمۍ د محصلینو په فراغت غونډه کې ګډون وکړ
د ملي دفاع پوهنتون د ځوانو افسرانو اکاډمۍ له څوارلسمې دورې څخه ۳۸۴ تنه محصلین په نظامي او ملکي برخو کې نن د یو لړ شانداره مراسمو په ترڅ کې فارغ شول.
دغو مراسمو کې د ملي دفاع وزارت سرپرست وزیر مولوي محمد یعقوب "مجاهد" ، د بهرنیو چارو وزارت لومړي مرستیال الحاج شیر محمد عباس ستانکزي او دګڼ شمېر نورو وزارتونو مرستیالانو، مسؤلینو او مجاهدینو ګډون وکړ.
مولوي محمد یعقوب "مجاهد" وویل: تاسې د دې مظلوم ولس مدافعین یاست، د دې ملت او ملي حاکمیت ساتنه پر موږ او تاسې فرض ده، د دښمن په وړاندې هر ډول دفاع ته چمتو اوسئ، خپل عزم مو قوي کړئ، په ټولو کارونو کې نیت یواځې د الله ج رضا وګرځوئ، په خپلو ځانونو او ولس پهره دار او څوکیدار واوسئ، د هېواد د ساتنې لپاره د قلم ترڅنګ ټوپک هم زده کړئ او څوک چې د افغانستان د خوشحالۍ دوښمن دی هغه زموږ د ټولو دوښمن دی په ګډه به يې ځپو او خپل اولس ته به خوښي وربښو.
همدا راز د بهرنیو چارو وزارت لومړي مرستیال الحاج شیر محمد عباس ستانکزي وویل: موږ او تاسې په خپلو سرښندنو ویاړ کوو خو غرور او تکبر نه پرې کوو، موږ باید یوه لحظه هم غفلت ونه کړو او خپل مسؤلیت په ښه توګه ادا کړو.
نوموړي زياته کړه چې موږ هيڅوک د کوم قوم په نوم نه پېژنو خو د یو افغان په نامه ټول ملت تر هر چا ښه پېژنو، خدمت يې کوو او د ملي يووالي ساتنه کوو.
همداراز نوموړي وويل: دا تاسې يئ چې زموږ ځمکنۍ بشپړتيا او سرحدات خوندي دي.
ستانکزي صاحب یو ځل بیا په بهر مېشتو افغانانو غږ وکړ چې خپل هېواد ته را ستانه شئ موږ به ستاسې د ځان، مال او عزت ساتنه کوو.
