امریکا له افغان هوايي ځواکونو سره د څلورA-29 جنګي الوتکو مرسته وکړه

له افغان هوايي ځواک سره د امریکا متحده ایالاتو له لوري مرسته شوې څلور (A-29)جنګي الوتکې؛ د افغان هوايي ځواکونو قول اردو کې د ملي دفاع وزارت سرپرست سترجنرال اسدالله خالد، د هیواد د هوايي ځواک قومندان ډګرجنرال عبدالفهیم رامین او د افغانستان لپاره د امنیت لېږد ګډې قومندانۍ سیستیکا قومندان؛ ډګرجنرال دیدریک په حضور کې افغان پوځ ته وسپارل شوې.

د ملي دفاع وزارت سرپرست سترجنرال اسدالله خالد د افغان پوځ د روزنې، ملاتړ او تجهیز برخه کې د امریکا، ناټو او نورو هیوادونو مرستې او همکارۍ وستایلې او ټینګار یې وکړ؛ چې له افغان امنیتي او دفاعي ځواکونو سره به تر هغه دا مرستې او همکارۍ دوام مومي څو چې سیمه او افغانستان کې ترهګري له منځه نه وي تللي.

سترجنرال اسدالله خالد دافغان دولت او طالبانو تر منځ خبرو ته په پام هیله مندي وښوده چې دغه خبرې هیواد کې د سولې لامل شي؛ خو ویې ویل:« له بده مرغه دښمن جګړې ته زور ورکړی او اوس هم د افغانانو وینې تویوي، خو په صراحت سره ډاډ درکوم چې د جګړې له لارې د دښمن بریا خیال، خوب او جنون دی.» د افغانستان ملي، دفاعي او امنیتي ځواکونه به په بشبړ قوت او خپلواکۍ سره د هیواد له لاسته راوړنو او ارزښتونو دفاع وکړي.

د هیواد د هوايي ځواک قومندان ډګرجنرال عبدالفهیم رامین وویل:« نن د افغان هوايي ځواک وړتیا او پیاوړتیا لوړې کچې ته رسېدلې چې په خپلواک ډول بریدونه طرح، پلان او ترسره کوي.» همداراز د سیستیکا قومندان ډګرجنرال دیدریک وویل:« دا مرستې له افغان امنیتي او دفاعي ځواکونو سره د ناټو او امریکا تل پاتې مرستې او همکاري ښکارندوی دي.»

سوپرټکانو یا (A-29)جنګي الوتکې د افغانستان جغرافیې سره برابرې دي، چې په لیزري، عادي او ماشین لرونکو بمونو سره د عملیاتو ترسراوي وړتیا لري او د دښمن د ستراتېژیکو موخو په له منځه وړلو کې ډېرې ګټورې دي.