د هېواد د وسلوال پوځ لوی درستیز په تخار ولایت کې د جزوتامونو تر کتنې وروسته بدخشان ته ولاړ او د ۲۱۹ عمرثالث فرقې څخه یې لیدنه وکړه
د هېواد د وسلوال پوځ لوی درستیز قاري محمد فصیح الدین "فطرت" شمال او شمال شرق زون ته د خپل سفر په ترڅ کې د تخار ولایت دوهم ، دریم، پینځم،شپږم سرحدي کنډکونو څخه چې په ینګي قلعه، چاه اب، خواجه بهاالدین او دشت قلعه ولسوالیو کې پراته دي تر کتنې وروسته بدخشان ولایت ته ولاړ او هلته یې د ۲۱۹ عمرثالث فرقې څخه لیدنه وکړه.
په دې کتنه کې لوی درستیز د یادې فرقې له مسوولینو سره د سرحدي ځواکونو د پیاوړتیا، امنیت، د ملت او دولت ترمنځ د ښو اړیکو په ټینګښت، د مجاهدینو په مسلکي کولو او د ملي اسلامي اردو د پیاوړتیا په موخه خبرې وکړې.
د وسله وال پوځ لوی درستیز له مجاهدینو او ولس څخه وغوښتل چې د افغانستان د دښمنانو په تبلیغاتو او افواهاتو باور ونکړي او د امنیت په تامین کې له دولت سره همکاري وکړي او د خپل دین او وطن په وړاندې خپل مسوولیت ترسره کړي.
همدارنګه د هېواد د وسله وال پوځ لوی درستیز د ۲۱۹ عمر ثالث فرقې له ښوونیز مرکز څخه تر لیدنې وروسته د دغې فرقې د مسؤلینو او مجاهدینو ستونزې او وړاندیزونه هم واورېدل او د حل ژمنه یې ورسره وکړه.
