د زمري ۲۴مه د افغانستان د فتحې او له امریکایي اشغاله د هیواد د آزادي په مناسبت بګرام هوايي اډه کې د لوی پوځي پرېډ په ترسره کولو سره دریېمه کلیزه ولمانځل شوه
نن د زمري ۲۴مه په افغانستان کې د نړۍ لوی زبرځواک، امریکا او متحدینو څخه د خپلواکۍ اخیستلو سره برابره ده، په همدې ورځ د افغانستان اسلامي امارت مجاهدینو د امریکا او د هغو د ملګرو پر وړاندې له شل کلنې سرښندنې او قربانيو وروسته د اشغال لمن ټوله او اشغالګر یې له خپل هیواد څخه وویستل، په همدې مناسبت د افغانستان اسلامي امارت د ملي دفاع وزارت دنورو ارګانونو سره په همغږۍ د هیواد د خلکو له اتلوليو، زړورتیاوو او سرښندنو څخه د درناوي په خاطر د بګرام په هوایي ډګر کې، پوځي پرېډ ترسره کړ او د هیواد د بېلابېلو ځانګړو پليوځواکونو، سپرو ځواکونو او د هوايي ځواک په ملتیا سره يې درېیمه کلیزه ولمانځله.
په دغه لوی پوځي پرېډ کې د ریاست الوزراء د ټولو مرستیالانو په ګډون د کورنیو چارو سرپرست وزیر الحاج خلیفه سراج الدین"حقاني"، د ملي دفاع وزارت سرپرست وزير مولوي محمد یعقوب "مجاهد"، د بهرنیو چارو سرپرست وزیر مولوي امیرخان متقي، د وسلوال پوځ لوی درستيز قاري محمد فصيح الدين"فطرت"، د اسلامي امارات د کابينې غړو، د ځینو بهرنیو هيوادونو سفیرانو، د وزارتونو رئيسانو،علماء کرامو، د وزارت منسوبينو او ګڼ شمېر نورو مجاهدينو او هیوادوالو ګډون درلود.
دغه ستره پوځي غونډه د قران عظیم الشان په تلاوت پیل او ورپسې دافغانستان اسلامي امارت د ریاست الوزراء مرستیالانو او د کابینې نورو غړو ویناوې وکړې او د ریاست الوزراء د مبارکۍ پیغام ټولو ځواکونو او ګډون والو ته وړاندې شو.
ورپسې د وسلوال پوځ لوی درستیز د پوځي تشريفاتو او د قطعاتو له معاینه کولو وروسته ځواکونو ته د مبارکۍ پیغام ولوست او د اسلامي امارت رهبري ته یې د ډاډګېرنې مراتب وړاندې کړل؛ مجاهدین په جهادي بڼه، د ځانګړو عملیاتو کنډک، د ملي نظامي اکاډمۍ محصلین، د پليو، سپرو، هوايي ځواکونه او نورو قطعات په ځانګړي نظامي نظم او ډسپلین د لوژ مخې ته د احترام په وړاندې کولو سره تیر شول او خپلې وړتياوې یې نندارې ته وړاندې کړې.
په دغو مراسمو کې ټولو داخلي او بهرنیو رسنیو ګډون درلود او د تلویزونونو له لارې په ژوندي بڼه نشرات روان وو.
په پای کې دغه مراسم له يرغلګرو څخه د غنیمت شويو بېلابېل ډول زغروالو پوځي وسايطو، پوځي تجهیزاتو ، پرمختللو وسلو نندارې ته په وړاندې کولو سره او د دعایې په ویلو سره پاى ته ورسيدل.
