د وسلوال پوځ لوی درستیز نورستان ولايت ته د خپل سفر په ترڅ کې د يوې پلې لوا پرانيسته وکړه
د ملي دفاع وزارت په وړانديز او د اسلامي امارت د عالي مقام په منظورۍ، د ۲۰۱ «خالد بن وليد» قول اردو اړوند په نورستان ولايت کې يوه پلې لوا جوړه او د پوځ لوی درستیز قاري فصيح الدين «فطرت»، پوځي او ملکي مسوولينو شتون کې په جنوب ختیځ زون کې پرانیسته وشوه.
د وسلوال پوځ لوی درستيز قاري فصيح الدين «فطرت» نورستان ولايت ته د خپل سفر په ترڅ کې په دغه ولايت کې يوه پلې لوا چې څه موده وړاندې د اسلامي امارت مشرتابه له خوا منظور شوې وه افتتاح کړه.
دغه مراسم چې په همدې موخه جوړ شوي وو، مولوي سعدالله «سعادت» د يادې لوا قوماندان او ملا عبدالطیف «فطرت» د ارکان رییس په توګه معرفي شول.
د وسلوال پوځ لوی درستیز په خپلو خبرو کې د هېواد اوسنی امنيت په تیرو ۴۰ کلونو کې بې ساری ياد کړ او زياته يې کړه: خپلواکۍ د لارې شهيدانو د وينو، قربانيو او سرښندنو په برکت اوس د يو خپلواک افغانستان څښتنان يو، د هيڅ بیګانه هېواد پورې تړلي نه يو.
همداراز د پوځ لوی درستیز چې د هوايي ځواکونو قول اردو قوماندان امان الدین «منصور» يې په دې سفر کې ملتيا کوله د ۲۰۱ «خالد بن وليدل» قول اردو څخه ليدنه وکړه.
