د هېواد دفاعي او امنیتي بنسټونو چارواکو د کندز امام صاحب د وروستۍ پېښې ځای ته سفر وکړ
د وسلوالو ځواکونو لوی درستیز مرستیال حاجي مالي خان د یو پلاوي سره، چې پکې د رییس الوزرا استازی، د کورنیو چارو او د استخباراتو عمومي ریاست مرستیالان شامل وو، د کندز ولایت د امام صاحب ولسوالۍ اړوند د «خانقا» جومات د وروستۍ پېښې ځای د لېدنې او بررسي په موخه ولاړل او د یادې پېښې د شهیدانو، ټپيانو او د هغوی وارثینو سره يې خواخوږي څرګنده او ډاډګیرنه يې ورکړه.
ياد پلاوي په مسجد کې د بې ګناه مسلمانانو وژنه یو وحشي عمل وباله او د دا ډول بريدونو موخه یې د دیني عالمانو او ملکي کسانو په شهادت رسول یاد کړل.
د افغانستان اسلامي امارت پلاوي، د خواخوږۍ او غمشریکۍ ترڅنګ د پېښې د عاملینو پيداکول او د عدالت مېز ته په راکش کولو ټینګار وکړ.
له بلې خوا دغه پلاوي د شهیدانو کورنیو او پاتې شوو ته نغدې پیسې هم ډالۍ او په راتلونکي کې د یاد جومات په معیاري توګه د بیا ترمیم خبر ورکړ.
