د ملي دفاع او کورنيو چارو وزارتونو سرپرست وزيرانو د ۲۰۳ منصوري قول اردو د بېلابېلو برخو څخه لېدنه وکړه
د ملي دفاع وزارت سرپرست وزیر مولوي محمد يعقوب «مجاهد» او د کورنيو چارو وزارت سرپرست وزير خليفه سراج الدین «حقاني» پکتیا ولایت ته د خپلو سفرونو په ترڅ کې د ۲۰۳ منصوري قول اردو د بېلابېلو برخو څخه لېدنه وکړه.
په هغو مراسمو کې چې په همدې موخه د "منصوري" قول اردو په مقر کې جوړ شوي وو، د قول اردو د رهبرۍ د راپورونو له اورېدو وروسته، د ملي دفاع وزارت سرپرست وزير د دوی فعالیتونه او لاسته راوړنې مثبتې وارزولې او يو شمېر مجاهدين يې په نغدي ډاليو وهڅول.
د کورنیو چارو وزارت سرپرست وزير د خپلو خبرو په یوه برخه کې د اسلامي امارت مجاهدینو ته د یووالي، همغږۍ، اطاعت او د مشرانو د اوامرو په تطبيق او له خلکو سره په ښه چلند سپارښتنه وکړه.
په اخر کې د ملي دفاع او کورنیو چارو وزارتونو سرپرست وزيرانو د دغه قول اردو له سوق او ادارې، ورکشاپونو، روغتون او بېلابېلو څانګو څخه لېدنه وکړه او د شته ستونزو د حل په موخه یې مسوولینو ته لازمې لارښوونې وکړې.
