د ملي دفاع وزارت مشرتابه لومړنۍ غونډه د قول اردوګانو د قوماندانانو او مرستيالانو په ګډون تر سره شوه
د ملي دفاع وزارت سرپرست وزير مولوي محمد يعقوب "مجاهد" د ياد وزارت د مشرتابه په لومړنۍ غونډه کې، چې پکې د مرکزي او سيمه ايزو قول اردوګانو قوماندانانو او مرستيالانو ګډون درلود، په بيلابيلو موضوعاتو خبرې ترسره کړې.
د ملي دفاع وزارت سرپرست وزير د قول اردوګانو د مشرتابه د ګزارشونو او وړانديزو اوريدلو وروسته، د کارونو په چټکتيا، د لواګانو او پوځي قطعاتو په فعالولو، د سرحداتو په کنټرول او ساتنه، په ښه توګه د امنيت ټينګښت، د اسلامي امارت د ملي دفاع وزارت د ځواکونو، کارکونکو ثبت او راجسټر، د اداراتو او قول اردوګانو د کاري سيسټمو په برابرولو باندې خبرې وکړې او لازمې لاښوونې يې کړې.
همدا راز د ملي دفاع سرپرست وزير د ديني، عقيدتي، عصري او مسلکي زده کړو تر څنګ په پوځي قطعاتو کې پر پوځي زده کړو هم ټينګار وکړ.
