د ملي دفاع وزارت سرپرست وزیر د ۲۰۹ شاهین قول اردو سیمه ایز روغتون کې د دفاعي او امنیتي ځواکونو د ټپيانو پوښتنه وکړه او ډاډګیرنه یې ورکړه
د ملي دفاع وزارت سرپرست وزیر ستر جنرال بسم الله محمدي نن د خپل سفر په بهیر کې د ۲۰۹ شاهین قول اردو سیمه ایز روغتون ته ولاړ او هلته یې د دفاعي او امنیتي ځواکونو پوښتنه وکړه او ډاډ ګیرنه یې ورکړه.
د ملي دفاع سرپرست وزیر د هېواد او خلکو د هوساینې او دفاع په لاره کې د دفاعي او امنیتي ځواکونو سرښندنې, اتلولۍ او د خپلو خوږو ځانونو څخه تېریدلو له کبله ترې قدردانی او مننه وکړه, د دوې برحقه مبارزه یې د راتلونکو نسلونو له پاره ویاړ وباله.
ټولو ټپيانو په لوړه روحیه او انګیزه د هېواد څخه سپيڅلې دنده خپله هېوادنۍ او دیني وجیبه یاده کړه او ټينګار یې وکړ, چې د بشپړې روغتیا وروسته به بیا ځلې د جنګ ډګر ته ځي, د هېواد او خلکو د دښمنانو پر وړاندې به جنګیږي.
همدا راز د ملي دفاع سرپرست وزیر د ۲۰۹ شاهین قول اردو ساحوي روغتون د صحي ټیم په مشرۍ په جوړه شوې غونډه کې د دغه روغتون ستونزې او نیمګړتیاوې وڅیړلې او مسؤلینو ته یې لازمې لارښوونې وکړې چې ستونزې یې حل کړي.
