په کابل کې د شهید برید جنرال سهراب عظیمي او د هغه د ملګرو جنازې مراسم د ملي دفاع وزارت د مشرتابه په شتون کې تر سره شول
د شهید برید جنرال سهراب «عظیمي» او د هغه د ۲ ملګرو جنازې مراسم د ملي دفاع وزارت د وسلوال پوځ لوی درستیز ستر جنرال محمد یاسین «ضیاء», جنرالانو, افسرانو، د پخواني حکومت لوړ پوړو چارواکو، د ولسې جرګې استازو او د شهیدانو د کورنیو د محترمو غړو په شتون کې نن د سردار محمد داود خان په روغتون کې تر سره شول.
برید جنرال سهراب «عظیمي» په ۱۳۹۳ کال کې د ترکې هېواد له ملي پوځي اکاډمۍ څخه د دوهم بریدمن په رتبه فارغ شو، په ۱۳۹۴ او ۱۳۹۵ کلونو کې د وسلوال پوځ لوی درستیز د امریو سره سم د لومړي بریدمن او تورنۍ رتبو ترفیع وکړه او په ۱۳۹۹ کال کې د ملي دفاع وزیر د امريې مطابق د جګړنۍ رتبې ته ترفیع ورکړل شوه.
شهید «عظیمي» د هېواد او خلکو د دفاع په لاره کې د سرښندونکو، ارزښتناکو او نه ستړي کیدونکو هلو ځلو له امله د ۱۴۰۰/۳/۲۷ د وسلوال پوځ د لوی درستیز د امریې مطابق د ډګرمنۍ رتبې ته ترفیع وکړه، د ملي دفاع وزارت په وړاندیز او د جمهوري ریاست د عالي مقام په منظورۍ نوموړي ته د ډګروالۍ او برید جنرالۍ رتبې ورکړل شوې.
برید جنرال سهراب «عظیمي» د هېواد او خلکو د دفاع په لار کې د ۱۴۰۰/۳/۲۷ د سنګر ملګرو سره یو ځای د فاریاب ولایت دولت اباد ولسوالۍ کې په شهادت ورسیدل.
