د ۲۰۳ تندر قول اردو څخه ۱۱۵۰ سرتېري فارغ شول
د ۲۰۳ تندر قول اردو د ښوونیز مرکز څخه د ملي اردو ۱۱۵۰ تنه سرتيري د یو لړ بنسټیزو پوځي زده کړو وروسته نن فارغ شول.
د سرتیرو د فراغت په مراسمو کې قول اردو د ښوونې او روزنې مدیر ډګروال محمود حبیبي د قول اردو د ښوونیز مرکز قوماندان مسولینو افسرانو، برید ملانو او سرتیرو ګډون درلود.
د فراغت په غونډه کې اړوندو مسولینو فارغ شوو سرتیرو ته وویل، تاسو د خپلې خاورې او ولسونو څخه د ساتنې لپاره یو لوی او ارزښتناکه قدم اوچت کړی او د امنیت د ټینګښت په برخه کې د پام وړ ښه والی به راشي.
د امنیتي ځواکونو د ليکو سره ستاسو یو ځای کیدل ستاسو د همسنګرانو او عامو خلکو مورال پیاوړی کوي او ترهګرو ته خبرداری ورکوي چې د دې خاورې ریښتیني بچیان په هر ډول حالاتو کې د هیواد او ولسونو څخه ساتنې ته چمتو دي.
دغو تازه فارغ شویو ځواکونو ډاډ ورکړ چې په هېواد کې به د تل پاتې سولې او ارامتیا د ټینګښت په موخه په ټول ځواک او توان سره هڅه وکړي او هېڅ چاته به اجازه ورنکړي چې هېوادوالو ته زیان ورسوي.
