د ملي دفاع وزارت سرپرست ستر جنرال اسدالله خالد د خوست ولایت د امنیتي وضعیت د څیړنې په موخه دغه ولایت ته سفر وکړ
د ملي دفاع وزارت سرپرست ښاغلي ستر جنرال “اسدالله خالد” د ملي امنیت د لوی ریس جنرال “ضياء سراج” په ملتیا نن د خوست ولایت ته سفر وکړ او د دغه ولایت د امنیتي وضعیت د څیړنې په موخه یې د خوست له محترم والي “صدیق پتمن”او ددغه ولایت له امنیتي مسولینو سره لیدنې وکړې.
د دغه سفر په ترڅ کې د ملي دفاع سرپرست وزیر ښاغلي خالد د خوست ښار له ښاریانو سره له نیږدې وکتل، په ښار کې وګرځید او د خلکو ستونزې او وړاندیزونه یې واوریدل.
د ملي دفاع وزارت سرپرست د خوست له ځانکړې قطعې هم لیدنه وکړه او د دوې له لاسته راوړنو او د خوست خلکو ته د امنیت په راوستو کې له کوښښونو یې تقدیر وکړ.
د ملي دفاع وزارت سرپرست دفاعي او امنیتي ادارو او منسوبینو ته لارښونه وکړه چې د خوست د خلکو د امنیت لپاره خپل کوښښونه لاپسې زیات کړي.
