د پکتیکا ولایت له مخورو، سپین ږیرو او قومي مشرانو سره د وسله وال پوځ لوی درستیز او د ملي دفاع وزارت د سرپرست لیدنه
د وسله وال پوځ لوی درستیز او د ملي دفاع وزارت سرپرست ستر جنرال محمد یاسین "ضیا" د پکتیکا ولایت له یوشمیر مخورو، سپین ږیرو او قومي مشرانو سره نن د خپل کار په دفتر کې ولیدل.
په دې لیدنه کې د پکتیکا ولایت دغو مشرانو د وسله وال پوځ لوی درستیز او د ملی دفاع وزارت له سرپرست څخه په هېواد کې په ځانګړي توګه د پکتیکا ولایت د امنیت د ټینګښت په برخه کې د دوی له هڅو او کړنو ستاینه او قدردانی وکړه او وې ویل چې د پکتیکا ولسونه په کلکه توګه د خپلو زړورو دفاعي او امنیتي ځواکونو په خوا کې دي او د دوی د مېړانو په پایله کې دښمن ته تل غاښ ماتونکي ځوابونه ورکړل شوي دي.
همداراز دغو مشرانو د پکتیکا ولایت په یوشمیر سیمو کې د امنیت د لا ټینګښت په برخه کې خپلې ستونزې او وړاندیزونه د ملي دفاع وزارت له سرپرست سره شریک کړل.
د وسله وال پوځ لوی درستیز او د ملي دفاع وزارت سرپرست ستر جنرال محمد یاسین "ضیا"، د هېواد له دفاعي او امنیتي ځواکونو څخه د پکتیکا ولایت د ولسونو له کلک ملاتړ څخه مننه وکړه او دوی ته یې ډاډ ورکړ چې د پکتیکا د امنیت ټینګښت زمونږ په لومړیتوبونو کې دی او ددغه ولایت د امنیت د لا ټینګښت په برخه کې به له پخوا لا ډیره پاملرنه وکړي.
