د وسلوال پوځ لوی درستيز په حضور کې د ۲۰۹ الفتح قول اردو څخه ۱۱۶ کمانډويان فارغ شول
تيره ورځ د هېواد د وسلوال پوځ لوی درستیز قاري فصيح الدين «فطرت» بلخ ولايت ته د سفر په ترڅ کې، د ۲۰۹ الفتح قول اردو د ليدنې تر څنګ د ۱۱۶ کمانډو ځواکونو، په هغه مراسمو کې ګډون وکړ، چې دغه ځواکونه ترې د يو لړ پرمختللو مسلکي او فکري ښوونو وروسته، فارغ شول.
د وسلوال پوځ لوی درستیز د سرتيرو مثبتې ارزونې او د مبارکۍ ویلو ترڅنګ وويل:«تاسو د هېواد او اسلام هغه واقعي مدافعين او ساتونکي ياست، چې نن ورځ ستاسې په سرښندنې او شهامت ټول وياړ کوي.»
په دې مراسمو کې، د هېواد هوايي ځواکونو عمومي قوماندان مولوي امان الدین «منصور» د سمنګان ولايت والي مولوي عبدالرحمان «قندوزي»، د ۲۰۹ الفتح قول اردو قوماندان امير خان «حقاني»، يو شمير پوځي او ملکي مسوولينو هم شتون درلود.
دغو سرتيرو د کمانډوي مسلکي حرکاتو په ترسره کولو سره ډاډ ورکړ، چې د دښمن هر ډول اهدافو د له منځه وړلو توانايې لري.
له بلې خوا د وسلوال پوځ لوی درستیز د ۲۰۹ الفتح قول اردو د مسوولينو او منسوبينو سره وليدل، د هغوی ستونزې او وړاندیزونه يې واوريدل.
