۱۲۲۷ تنه سرتیري، بریدملان او افسران له پوځي زده کړو وروسته فارغ شول
۱۲۲۷ تنه سرتیري، بریدملان او افسران له ګډ محاربوي قوماندانۍ څخه فارغ شول.
ددغو اتلانو د فراغت مراسم نن د ملي دفاع وزارت د ښوونې او روزنې د عمومي قوماندان ډګر جنرال پاینده محمد ناظم او ددغه وزارت د جنرالانو او افسرانو په شتون ترسره شو.
جنرال ناظم وویل: په پوځي تعلیماتو سمبالتیا او ستاسو دا لوی صفونه د دښمن پر زړه لړزه راولي او په هره کچه چې د عمل په ډګر کې په ژمنتیا مبارزه وکړئ په هماغه کچه به د خپلو خلکو په زړونو کې ځای ترلاسه کړئ او د هېواد په تاریخ کې به د اتلانو او سرښیندونکو په توګه یاد شئ.
همداراز د ګډې محاربوي قوماندانۍ سرپرست ډګروال عبدالظاهر بارز وویل چې دغو ځواکونو د خپلو زده کړو په ترڅ کې، د بیلابیلو وسلو د استفادې او جنګي تاکتیکونو لپاره لازم مهارتونه ترلاسه کړي دي او اوس په بشپړ ډول چمتو دي څو د خپلو خلکو له ځان او مال څخه په سمه توګه دفاع وکړي.
فارغانو د افغانستان د خلکو د دښمنانو پر وړاندې د صادقانه مبارزې ډاډ ورکړ او ټولو په یوه غږ هېواد ته د خدمت کولو لپاره د چمتوالي اعلام وکړ.
