د ۲۰۵ اتل قول اردو د لومړۍ لوا قوماندان شهید تورنجنرال مزمل ساپي د جنازې مراسم
د ۲۰۵ اتل قول اردو لومړۍ لوا قوماندان شهید تورنجنرال مزمل "ساپي" د جنازې مراسم، نن له غرمې مخکې د شهید سردار محمد داوود خان په روغتون کې د ملي دفاع وزارت لومړي مرستیال او سرپرست شاه محمود"میاخیل"، د ستر درستیز مرستیال ډګرجنرال اقبال علي "نادري"، دملي شورا د یوشمیر وکیلانو، د ملي دفاع وزارت د جنرالانو، افسرانو او دشهید د کورنۍ په ګډون سره ترسره شول.
د ملي دفاع وزارت لومړي مرستیال او سرپرست شاه محمود "میاخیل" د شهید تورنجنرال مزمل "ساپي" له کړنو، مبارزو او اتلولۍ ستاینه او قدرداني وکړه او د شهید "ساپي" له کورنۍ سره خپله ژوره خواخوږي او غمشریکي څرګنده کړه.
د ملي دفاع وزارت او ستر درستیز مشرتابه د جنرال "ساپي" شهادت د هېواد لپاره ستره ضایعه بولي او شهید "ساپي" ته د الله پاک له درباره د جنت الفردوس او کورنۍ او دوستانو ته یې د جمیل صبر هیله کوي.
