د وسله وال پوځ لوی درستیز په ۲۱۹ عمر ثالث فرقه کې د ۳۰۰ تنه مجاهدینو فراغت غونډه کې ګډون وکړ
د ۲۱۹ ثالث عمر فرقې د لومړۍ لوا څخه ۳۰۰ تنه مجاهدین له دري میاشتو نظامي، مسلکي او عقیدتي زده کړو وروسته نن د یو لړ ځانګړو مراسمو په ترڅ کې چې د لوی درستیز قاري فصیح الدین ''فطرت''، د بدخشان والي مولوي امان الدين ''منصور''، نظامي او ملکي مسؤلینو، علماوو او مجاهدينو په کې ګډون درلود فراغت غونډه ترسره شوه.
په دغه فراغت غونډه کې د وسله وال پوځ لوی درستیز د الهي امتحان پر وړاندې د مجاهدینو زغم او استقامت یادونه وکړه او وه يې ویل، نن ورځ موږ د سکون او اسانتیاوو سره امتحان کيږو، نو راځې چې خپل مسؤلیتونه درک کړو، د خلکو او اسلامي نظام خدمت له پامه ونه غورځوو.''
همدا راز د بدخشان والي هم مجاهدین وهڅول چې د چارو د لا ښه پرمختګ په موخه په صادقانه توګه خدمت وکړي او له هغوي یې وغوښتل چې د ترلاسه شویو ارزښتونو په ساتنه کې له هېڅ راز هڅې ډډه ونه کړي.
دغه غونډه په ويناوو او د فارغانو له خوا د پوځي نمایشاتو په ترسره کولو او تقدیرنامو په ورکولو سره پای ته ورسیده.
