د وسله وال پوځ لوی درستیز د کمانډویانو له لاسته راوړنو او اتلولیو ستاینه وکړه
د هېواد د وسله وال پوځ لوی درستیز ستر جنرال "محمد یاسین ضیا" د ځانګړو عملیاتو- کمانډو په قول اردو کې د هغه سیمینار په پای کې چې د مسلکي وړتیاوو د لوړاوي، د محاربې ډګر د تجربو شریکولو او د شته ننګونو د حل په موخه جوړ شوی وو، د ملي اردو د کومانډویانو او ځانګړو قطعو له اتلولیو، سرښیندنو او لاسته راوړنو قدرداني وکړه.
د وسله وال پوځ لوی درستیز د هېواد د دښمنانو د له منځه وړلو په موخه د کومانډو او ځانګړو قطعو د جزوتامونو د وظایفو د ښه اجرا لپاره لازم هدایات او لارښونې وکړې او د ملي اردو په چوکاټ کې په ځانګړي توګه د ځانګړو قطعو کومانډویانو لپاره ددغه څېر سیمینارونو جوړول ارزښتناک وبلل.
همداراز د ځانګړو عملیاتوـ کمانډو قول اردو قوماندان ډګر جنرال ارکانحرب "محمد فرید احمدي" وویل: د ملي اردو ټول منسوبین په ځانګړي توګه کمانډویان د تل په څېر په هر ډول شرایطو کې په مېړانې سره له خپلې خاورې او هېوادوالو څخه د دفاع لپاره چمتو دي او هېڅکله به دښمن ته دا فرصت ورنکړي څو په دې خاوره کې خپلې شومې برنامې پلې کړي.
دغه مراسم د ستاینلیکونو په وېش سره پایته ورسیدل.
