د هیواد لوی درستیز د ۲۱۹عمرثالث فرقې اتمې سرحدي لواء څخه لیدنه وکړه
د وسله وال پوځ لوی درستیز قاري محمد فصیح الدین "فطرت" شمال زون ته د خپل سفر په دوام بدخشان ولایت کې د ملي اسلامي اردو له قطعاتو او جزوتامونو څخه د لیدنې پر مهال د ۲۱۹ عمرثالث فرقې له اتمې سرحدي لواء څخه لیدنه وکړه.
لوى درستيز د سرحدي منسوبینو د کار او فعاليتونو له ارزونې وروسته هغوى ته د نظم او دسپلين د مراعاتولو ترڅنګ وويل: «تاسو د جهاد سختې او ګرمې ورځې تر سر تېرې کړې دي، او اوس د هیواد د دفاع مرحلې ته داخل شوي ياست. د اسلامي نظام ځمکنۍ بشپړتیا او د خلکو د خدمت لپاره مو ګام پورته کړی؛ نو په دې برخه کې باید ستاسو پښې ونه لړزیږي او په لوړ هوډ سره د دغو ارزښتونو ساتنه وکړئ.»
لوی درستیز د خبرو په دوام زياته کړه: د ملي دفاع وزارت رهبري ژمنه ده چې د ملي اسلامي پوځ د منسوبینو لپاره د نظامي او مسلکي زده کړو د ترلاسه کولو په برخه کې اسانتياوې رامنځته او زمینه برابره کړي.
همداراز لوی درستیز د هغو اوازو په تړاو چې ګواکي د هیواد بېلابېلو برخو ته يې د سفر په لاره کې خنډونه جوړ شوي بې اساسه او د اسلامي امارت د دښمنانو منفی تبلیغات یاد کړل او ويې ويل: د اسلامي امارت مشرانو د خلکو د خدمت په خاطر زحمتونه ګاللي دي او د یو پرمختللي افغانستان د یووالي او عزت ساتلو لپاره شپه او ورځ کار کوي.
