د ملي دفاع وزارت په تالار کې له انګریزي ښکېلاک څخه د افغانستان د خپلواکۍ ۱۰۵ مه کلیزه ولمانځل شوه
له انګرېزي ښکېلاک څخه ۱۰۵ کاله وړاندې د غیورو افغانانو پر مټ خپلواکۍ اخیستلو او د افغان ملت د برم او پرتم د اعادې په موخه نن د ملي دفاع وزارت په تالار کې دغه کلیزه د یو لړ ځانګړو مراسمو په ترڅ کې ولمانځل شوه.
په دغه پرتمین مجلس کې د ریاست الوزراء اقتصادي او اداری مرستیالانو، د کورنیو چارو سرپرست وزیر مولوي سراج الدین حقاني، د ملي دفاع وزارت سرپرست وزیر مولوي محمد یعقوب مجاهد، د کابینې ځینو غړو، د استخباراتو ریاست عمومي رئیس او ګڼ شمېر مسؤلینو، مشرانو او هیوادوالو ګډون درلود.
غونډه د قران عظیم الشان د مبارکو ایاتونو په تلاوت سره پیل شوه، د ریاست الوزراء مرستیالانو او د کابینې ګڼ شمېر مسؤلینو د افغان ملت په ویاړونو او افتخاراتو هر اړخیزې ویناوې وکړې ورپسې د اسلامي امارت اعلامیه ګډون والو ته وړاندې شوه.
د ریاست الوزراء اقتصادي مرستیال ملا عبدالغني برادر د وسلوال پوځ لوی درستیز قاري محمد فصیح الدین فطرت په ملتیا د تشریفاتو ګنډک د ځانګړو تشريفاتو په ترڅ کې په ملي دفاع وزارت کې د ازادۍ څلي ته د ګلو ګېډۍ کېښوده.
له دې سره سم د ملي دفاع وزارت د هوایي ځواک الوتکو او چورلکو د کابل پر اسمان د اسلامي امارت د بيرغ په رپولو د خپلواکۍ د ورځې په موخه يې ګلونه او د مبارکۍ پاڼې له هوا څخه وشيندلې، غونډه د دعایې په ویلو سره پای ته ورسېده.
