د ملي دفاع وزارت د سر مفتشیت له تخصصي روزنیز څخه ۲۵ تنه مجاهدین فارغ شول
د ملي دفاع وزارت په تالار کې د سرمفتشیت د تخصصي روزنیز د کورس له څلورمې دورې څخه د سیمیزو قول اردوګانو، قطعاتو او جروتامونو ۲۵ تنه مجاهدین له دوه میاشتنی زده کړو څخه وروسته نن د یو لړ ځانګړو مراسمو په ترڅ کې فارغ شول.
دغه مراسمو کې د مسلح قواوو مرستیال حاجي مالي خان "صدیق"، د یاد وزارت سرمفتش مفتي لطیف الله "حکیمي" د ماليې وزارت د ارتقاء او ظرفیت لوړونې رئیس شېر زمان "بلوڅ" او ګڼ شمېر رئیسانو او منسوبینو ګډون درلود.
د مسلحو قواوو مرستیال حاجي مالي خان " صدیق" په وینا کې یاد فارغان خپلو مسؤلیتونو ته متوجې کړل او زیاته یې کړه چې موږ باید د شریعت پابندي وکړو او تاسو خپل کارونه په اخلاص او صداقت سره ترسره کړئ.
همدا راز سرمفتش مفتي لطیف الله "حکیمي" په خبرو کې زیاته کړه چې د یو کس په پلټنه کې ډېر دقت کوئ لومړی د ښو او بدو تفکیک وکړئ وروسته بیا عمل ترسره کړئ، په پای کې یادو فارغانو ته تصدیق پاڼې هم ورکړل شوې.
