د ملي دفاع سرپرست وزیر بامیانو ولایت ته د سفر په ترڅ کې د دغه ولایت له علماوو او مخورو سره ولېدل
د ملي دفاع سرپرست وزیر مولوي محمد یعقوب "مجاهد" بامیان ولایت ته د سفر په ترڅ کې د دغه ولایت له علماو، قومي مخورو او ځوانانو سره وکتل.
د باميانو ولايت مخورو دغه ولايت ته د ملي دفاع د سرپرست وزير د سفر هرکلى وکړ؛ دوی دغه سفر د ملت او دولت تر منځ د باور فضا رامنځته کولو په موخه یو نیک فال وباله او له اسلامي امارت څخه یې خپل بشپړ ملاتړ اعلان کړ.
د ملي دفاع وزارت سرپرست د بامیان ولایت د شریفو خلکو له بشپړ ملاتړ او مېلمه پالنې څخه قدرداني وکړه او ډاډ یې ورکړ چې د دوی وړاندیزونه او ستونزې به له اړوندو چارواکو سره شریکې کړي.
همدا راز د ملي دفاع وزارت سرپرست د هغو دفاعي منسوبینو او مسوولینو سره هم وکتل، چې د لویو لارو امنیت د ټېنګښت له پاره پر دندو بوخت دي.
